Intent

Ils DDL, il «Solothurn dal:las Rumantsch:as», porschan dapi l‘onn 1990 ad autur:as, ad ami:as da la litteratura ina plattafurma ed in‘occasiun per sa scuntrar, barattar ideas e survegnir novs impuls. Mintg‘onn vegnan preschentadas e discutadas novas ovras litteraras e lavurs linguisticas entaifer in motto general. Per il solit èn reservadas la sonda e la dumengia per la litteratura, durant che las sairadas vulan integrar er autras furmas culturalas (musica, teater, cabaret) e dar ina pussaivladad da seser ensemen tar in bierin da la bar litterara. Grazia a la derasaziun tras las medias – Radiotelevisiun Svizra Rumatscha (RTR) è noss partenari da medias – vegn cuntanschì in grond public entaifer ed ordaifer il Grischun. Ils Ddl promovan pia sco event cultural explicitamain l‘identitad culturala da la Rumantschia.

Organisaziun

Il comité dals DDL, quai èn quatter Rumantsch:as che vulan mantegnair ed avanzar quest event litterar, cultural ed ussa dapi 30 onns popular. Per che las 150 valladas grischunas, lur abitant:as e lur idioms as possian scuntrar a Domat, lavura il comité cun bler idealissem e plaschair e per gronda part senza paja. L‘organisaziun tetgala dals DDL è la Uniun per la Litteratura Rumantscha (ULR); ella sustegna e promova la litteratura rumantscha a moda integrala da lectorats professiunals fin la vendita da cudeschs. Entaifer la ULR è il comité dals DDL dentant sulet respunsabel per il program, l‘organisaziun, la realisaziun e la finanziaziun dals Dis da litteratura.

Impressum

Patrunadi: Uniun per la Litteratura Rumantscha (ULR)
Comité d‘organisaziun: Sara F. Hermann, Toni Vinzens, Laura Pfister, Sabrina Bundi
Creaziun: Jörger-Stauss, Annatina Nay
Programmaziun: Simon Wülser

Partenaris

Sponsurs e fauturs